V wéi vreckt, w wéi Vitess ass de literareschen Debut vum Samuel Hamen. Seng Erzielung iwwert déi tragesch Figur Devid Risch ass voll mat Witz an Ironie a gläichzäiteg bréngt den Auteur et fäerdeg, de Lieser direkt an d´Häerz ze treffen.Den Devid Risch, nee, net David, och net Frisch, den Devid Risch huet Problemer. Hie flucht ze dacks, drénkt ze vill a stécht ze fest an de falschen Erënnerungen. Seng Elteren hu sech fréi ëmbruecht. Seng Léift ass just nach ee grousse Schwier am Kapp. A seng Ambitioun Auteur ze ginn, ass zesummegeschmolt op d´Aufgab, den Dag iergendwéi ze iwwerstoen. Zéng Therapiesëtzunge sollen eng Stäip sinn, een Auswee opweisen. Ma hëllefen e Stréchmännchen am Schnéi, en Avocadobam an een dafe Mupp wierklech dobäi, nees op déi richteg Bunn ze fannen?