Mir stellen Iech d’Isabelle Marinov, Lëtzebuerger Schrëftstellerin mat internationaler Reputatioun, mat sengem neie Kannerbuch De Leo an den Oktopus, vir. Den engleschen Originaltext koum ufanks 2021 bei Templar (GB) eraus a gouf fir d’Éditions Guy Binsfeld vun der Autorin, zesumme mam Martine Schoellen, an d’Lëtzebuergescht iwwersat.
De Leo an den Oktopus erzielt d’Geschicht vum klenge Leo, deen Autismus huet, wat him déi alldeeglech Kommunikatioun mat senge Matmënschen net esou einfach mécht. Enges Daags geet hien an den Aquarium a kritt do d’Maya virgestallt: een Oktopus. Bis dohi wousst de Jong wéineg iwwert dës Mieresbewunner, mee wëssbegiereg, wéi en ass, liest en, wat e fanne kann. A schlussendlech plangt e souguer ee festen Dag an der Woch fir d’Maya an – Freides ass elo Oktopusdag! D’Maya gräift dem Leo mat sengen aacht Tentakelen ënnert d’Äerm, fir sech an der Welt zurecht ze fannen an erméiglecht him eppes, wat hien ni fir méiglech gehalen hätt: den Ufank vun enger Frëndschaft.
Eegen Erfarungen hunn d’Isabelle Marinov (www.isabellemarinov.com) zu dëser emouvanter Geschicht inspiréiert an dem Chris Nixon seng wonnerbar Illustratioune loossen Iech fërmlech an d’Säiten andauchen.